Urkunden IV 9
Originally encoded in RES, as part of the St Andrews Corpus.
Converted automatically to Unicode using HieroJax.
𓈖𓑕𓉻𓑕𓂝𓑕
(A1) 𓏏𓈖𓏠𓐍𓑕𓍊𓑕𓆑𓁷𓑕𓏤𓑕𓄣𓑕𓏤𓑕𓑃︀𓂜𓑕
(A2) 𓅠𓐝𓅱𓏏𓃹𓑕𓈖𓑕𓅪𓑕𓆑𓑕
(A3) 𓐍𓂋𓍲𓈖𓇋𓏏𓇋𓀙𓏤𓏤𓏤𓈙𓆑𓅴
(A4) 𓎡𓆑𓅴𓂬𓂡𓁷𓏤𓈉𓏏𓏤𓎟𓏏𓍃𓅓
(A5) 𓏏𓈙𓏏𓏴𓂻𓂋𓎟𓇾𓇾𓁷𓏤𓊪𓂋𓇋𓆴𓂡
(A6) 𓎟𓈎𓂋𓊃𓏏𓊭𓐝𓎿𓎿𓎿𓇓𓏏𓈖𓄓𓋨
(A7) 𓇺𓄟𓋴𓆓𓂧𓏏𓅱𓈖𓆑𓊪𓈖𓇑𓏌𓏏𓃀
(B1) 𓉐𓑕𓂋𓑕𓏏𓑕𓂻𓅓𓑕𓉔𓑕𓂋𓑕𓇳𓑕𓏤𓑕𓑃︀𓇼𓑕𓀢𓑕𓇳𓑕𓏤𓑕𓀭𓑕𓊵𓑕𓏏𓑕𓊪𓑕𓆑𓅓𓋹𓈖𓐍𓐝𓈌𓏏𓉐
(B2) 𓈖𓑕𓏏𓇯𓋴𓐍𓂋𓑃︀𓅓𓎛𓇳𓎱𓃀𓊃𓈖𓏤𓏤𓏤𓎟𓈖𓊪𓏏𓇯𓈖𓇿𓏤𓈅
(B3) 𓇋𓋔𓑃︀𓅨𓑃︀𓂞𓑕𓂞𓑕𓁶𓑕𓏤𓑕𓂾𓑕𓏜𓑕𓐝𓑕𓁷𓑕𓏤𓑕𓈖𓑕𓑅︀𓄓𓑕𓑅︀𓄓𓑕𓑅︀𓄓𓑕𓑅︀𓀀𓑕𓏤𓑕𓏤𓑕𓏤𓑕𓏠𓈖𓆑𓇋𓏏𓇋𓀙𓏤𓏤𓏤
(B4) 𓂋𓏤𓋴𓉔𓂋𓂋𓑕𓀀𓑕𓅓𓇿𓑕𓏤𓑕𓈅𓑕𓂋𓑕𓇥𓑕𓂋𓑕𓆑𓑕𓑃︀𓎟𓐝𓑉𓇓𓌞𓂻𓂋𓂻𓏏𓏤𓏤𓏤𓆑𓐝𓊨𓏏𓉐𓎟𓏏
(B5) 𓁷𓏤𓈖𓈖𓈖𓁷𓑕𓏤𓑕𓇿𓑕𓏤𓑕𓈅𓑕𓁷𓏤𓈉𓏏𓏤𓇔𓑕𓏏𓏤𓎔𓑕𓏏𓑕𓏏𓑕𓑃︀𓉔𓑕𓂋𓑕𓂋𓑕𓅱𓑕𓏜𓑕𓎟𓑕𓇿𓑕𓇿𓑕
(B6) 𓁷𓏤𓋴𓐍𓂋𓑕𓅱𓏜𓏤𓏤𓏤𓆑𓌂𓊪𓂡𓈖𓀀𓂝𓑆︀𓑃︀𓏏𓑕𓅱𓑕𓑃︀𓇵𓏤𓏤𓏤𓈖𓏏
(B7) 𓇳𓏤𓎟𓉐𓂋𓂻𓅓𓏃𓈖𓏏𓉐𓑕𓁷𓏤𓋴𓑕𓉔𓑕𓂋𓏏𓑕𓆈𓑕𓏏𓑕𓏤𓑕𓏤𓑕𓏤𓑕𓑃︀𓅧𓑕𓈎𓑕𓂻𓑕𓁷𓑕𓏤𓑕𓋴𓑕𓏇𓑕𓇋𓑕𓏏𓑕𓀁𓑕𓉐𓑕𓂋𓑕𓂻𓑕𓌨𓑕𓂋𓑕𓎗𓅱𓏏𓏛
(B8) 𓊑𓏏𓏤𓎟𓏏𓌨𓂋𓊨𓏏𓉐𓁷𓏤𓆑𓆤𓏏𓋩𓎡𓑕𓆑𓑕𓂝𓑕𓅱𓑕𓂬𓑕𓂡𓑕
(B9) 𓈎𓈖𓏭𓂡𓈖𓇓𓏏𓈖𓇺𓄟𓋴𓀼𓐙𓊤︂𓆓𓑕𓂧𓑕𓈖𓑕𓆑𓑕𓊪𓑕𓈖𓑕𓇑𓑕𓏌𓑕𓏏𓑕𓃀𓑕
(B10) 𓆓𓂧𓆑𓇋𓅱𓌞𓋴𓂻𓈖𓀀𓇓𓏏𓈖𓇋𓑕𓇋𓑕𓅱𓑕𓀰𓑕𓏤𓑕𓏤𓑕𓏤𓑕𓆤𓑕
(B11) 𓏏𓅂𓀰𓏤𓏤𓏤𓊹𓊹𓊹𓀭𓏤𓏤𓏤𓆣𓂋𓈖𓀀𓑕𓐍𓑕𓂋𓑕𓋴𓑕𓈖𓑕𓏤𓑕𓏤𓑕𓏤𓑕𓂋𓑕𓂻𓑕𓏏𓑕𓏤𓑕𓏤𓑕𓏤𓑕
(B12) 𓋴𓈖𓏤𓏤𓏤𓁷𓏤𓈉𓏏𓏤𓇔𓏏𓏤𓎔𓏏𓏏𓅓𓃀𓅱𓎟𓑕𓆣𓑕𓂋𓑕𓈖𓑕𓊃𓈖𓏤𓏤𓏤
(B13) 𓇋𓅓𓇓𓏏𓆤𓏏𓍹𓇳𓎟𓄇𓄇𓍺𓐙𓑀𓊤︂𓇓𓏏𓆤𓏏𓍹𓇳𓂦𓂓𓍺𓐙𓑀𓑕𓊤︂𓑕𓇓𓏏𓆤𓏏
(B14) 𓍹𓇳𓉻𓆣𓂓𓍺𓐙𓑀𓊤︂𓇓𓏏𓆤𓏏𓍹𓇳𓉻𓆣𓈖𓍺𓐙𓑀𓊤︂𓄤𓇋𓇋𓏏𓂋𓊹𓊪𓄤𓈖𓇓𓏏𓆤𓏏𓍹𓇳𓏠𓆣𓍺
(B15) 𓏙𓋹𓆓𓏏𓇿𓇋𓅱𓄖𓂻𓈖𓀀𓀗𓏏𓄤𓆑𓂋𓏏𓇋𓅱𓀀𓅓
(B16) 𓋹𓈖𓐍𓈖𓐍𓂋𓇓𓏏𓈖𓇋𓅱𓅓𓎿𓅱𓏏𓏤𓏤𓏤𓐍𓂋𓑕𓍛𓍛𓍛𓋴𓈖𓏤𓏤𓏤
(B17) 𓇋𓅱𓌻𓂋𓅱𓏏𓀁𓀀𓅓𓍉𓎃𓊪𓉐𓋹𓍑𓋴𓄙𓅓𓈖𓈖
(B18) 𓀀𓊹𓈞𓏏𓎿𓅱𓏏𓏤𓏤𓏤𓇓𓈞𓏏𓅨𓂋𓏏𓍹𓇳𓁧𓂓𓍺𓐙𓑀𓊤︂𓇋𓅱𓄞𓂧
(B19) 𓂑𓈖𓀀𓅭𓏤𓊃𓅨𓂋𓏏𓇓𓏏𓈖𓅭𓏏𓍹𓇳𓄤𓄤𓄤𓀯𓍺𓐙𓑀𓊤︂𓇋𓅱𓊃𓐝
(B20) 𓀔𓏶𓅓𓑕𓏭𓑕𓏠𓈖𓂧𓂑𓂑𓑕𓄓𓋨𓄙𓀁𓎡𓆑𓂝𓂬𓂡𓇺𓄟𓋴𓆓𓂧𓏏𓅱𓊪𓈖𓇑𓏌𓏏𓃀
(C1) 𓂋𓊪𓂝𓄂𓂝𓆤𓏏𓋩𓋴𓍋𓌡𓏏𓏤𓂝𓑃︀
(C2) 𓄓𓋨𓄙𓅱𓎡𓆑𓂝𓅱𓂬𓂡𓇹𓄟𓋴𓀽𓆓𓂧𓅱𓏏𓑕𓈖𓆑𓊪𓈖𓇑𓏌𓏏𓃀𓀽𓐙𓑀𓊤︂
(C3) 𓆓𓂧𓆑𓇋𓅱𓌞𓋴𓂻𓈖𓇓𓏏𓆤𓏏𓍹𓇳𓎟𓄇𓏏𓏏𓍺𓐙︂𓊤𓎡𓆑𓂝𓂬𓀀𓈖𓆑𓁷𓏤𓍑𓉔𓏭𓈉
(C4) 𓋹𓏺𓂧𓏏𓄹𓏺𓇋𓅱𓌞𓋴𓂻𓈖𓇓𓏏𓆤𓏏𓍹𓇳𓂦𓂓𓍺𓐙︂𓊤𓎡𓆑𓂝𓂬𓀀𓈖𓆑𓅓𓎡𓈙𓈉
(C5) 𓋹𓀏𓏺𓄙𓅓𓁹𓈖𓈖𓇓𓏏𓆤𓏏𓍹𓇳𓂦𓂓𓍺𓐙︂𓊤𓎡𓆑𓂝𓂬𓈖𓆑𓁷𓏤𓎔𓏏𓏭𓆭𓅱
(C6) 𓎡𓉔𓎡𓈉𓂧𓏏𓄹𓏺𓏺𓏺𓇋𓅱𓌞𓋴𓂻𓈖𓇓𓏏𓆤𓏏𓍹𓇳𓉼𓆣𓂓𓍺𓐙︂𓊤𓎡𓆑𓂝𓂬𓀀𓈖𓆑𓅓𓎡𓈙𓈉
(C7) 𓋹𓀏𓏺𓏺𓁷𓂋𓅱𓈐𓂋𓐓𓋹𓀏𓏤𓏤𓏤𓏎𓈖𓀀𓅓𓎡𓈙𓈉𓂜𓐎𓏛𓈖𓀀𓋴𓏏
(C8) 𓄙𓅓𓁹𓈖𓈖𓇓𓏏𓆤𓏏𓍹𓇳𓉼𓆣𓂓𓍺𓐙︂𓊤𓎡𓆑𓂝𓂬𓀀𓈖𓆑𓁷𓏤𓈉𓈖𓏏𓈖𓄿𓉔𓂋𓏭
(C9) 𓈖𓄿𓈉𓂧𓏏𓄹𓎆𓎆𓏺𓃗𓏺𓅨𓂋𓂋𓇋𓇋𓏏𓌝𓏺𓇋𓅱𓌞𓋴𓈖𓇓𓏏𓆤𓏏𓍹𓇳𓉼𓆣𓋔𓍺𓐙︂𓊤
(C10) 𓏎𓈖𓏏𓈖𓁷𓏤𓆷𓇓𓅱𓈉𓋴𓐓𓌈𓋹𓀏𓏤𓏤𓏤𓆈𓏤𓏤𓏤𓅨𓏏𓂜𓐎𓏛𓈖𓀀𓋴𓏏
(D1) 𓂋𓑕𓊪𓑕𓂝𓑕𓄂𓑕𓂝𓑕𓋴𓑋𓍋𓑋𓌡𓏏𓏭𓋴𓉻𓑕𓏛𓑕𓈖𓑕𓇓𓑋𓏏𓑋𓀲𓑋𓋴𓇋𓈎𓂋𓏛𓈖𓑕𓆤𓏏𓀷𓑋
(D2) 𓁹𓑕𓈖𓑕𓎟𓑕𓇿𓑕𓇿𓑕𓂓𓆑𓑕𓏠𓈖𓏛𓌻𓂋𓏏𓅓𓇓𓏏𓈖𓉐𓏤𓎟𓎿𓎿𓎿𓅓𓍉𓎂𓋹𓍑𓋴
(D3) 𓉐𓑕𓂋𓑕𓂻𓑕𓂋𓑕𓇉𓁶𓉐𓁷𓑕𓏤𓑕𓋴𓑕𓉔𓑕𓂋𓑕𓏏𓑕𓆈𓏏𓏤𓏤𓏤𓄙𓀁𓆑𓂋𓏤𓈖𓆤𓏏𓀷𓈖𓃶𓏤𓏤𓏤𓆑𓄓𓋨
(D4) 𓄙𓑕𓅱𓎡𓆑𓂝𓅱𓂬𓂡𓇺𓄟𓋴𓀽𓆓𓂧𓈖𓆑𓊪𓈖𓇑𓏌𓑕𓏏𓑕𓃀𓆓𓂧𓆑𓎝𓎛𓏜𓅮𓄿𓑕
(D5) 𓍹𓋾𓈎𓀰𓍺𓋹𓆓𓏏𓇿𓇋𓅱𓂜𓏏𓈙𓏴𓂻𓀀𓂋𓇓𓏏𓀲𓁷𓏤𓊪𓂋𓇋𓆵𓂡𓏤𓏤𓏤𓆷𓂝𓏛𓐝𓑕
(D6) 𓇓𓑕𓏏𓑕𓆤𓏏𓍹𓇳𓎟𓄇𓏏𓏏𓍺𓐙︂𓊤𓄤𓇋𓇋𓏏𓏛𓂋𓇓𓏏𓆤𓏏𓍹𓇳𓉼𓆣𓋔𓍺𓐙︂𓊤𓇋𓅱𓀀𓅓
(D7) 𓎿𓋴𓏏𓈖𓏏𓐍𓂋𓇓𓏏𓀲𓄤𓇋𓇋𓏏𓂋𓇓𓏏𓆤𓏏𓍹𓇳𓏠𓆣𓍺𓋹𓆓𓏏𓇿𓂋𓂝𓈖𓈖𓇓𓏏𓆤𓏏𓍹𓇳𓂦𓂓𓍺
(D8) 𓋞𓈒𓏤𓏤𓏤𓂝𓂝𓋪𓏺𓏺𓈙𓃀𓅱𓋝𓏺𓏺𓄟𓋴𓎡𓏏𓅱𓏺𓃀𓎼𓇓𓅱𓌑𓑐𓋜𓑇𓏏𓎔𓏏𓆄𓅓𓐍𓏏𓃀𓏏𓑃︀𓏺𓑕
(D9) 𓂋𓂞𓈖𓈖𓇓𓏏𓆤𓏏𓍹𓇳𓉼𓆣𓂓𓍺𓋞𓈒𓏤𓏤𓏤𓂝𓂝𓋪𓑕𓏺𓏺𓏺𓏺𓈙𓃀𓅱𓋝𓏺𓏺𓏺𓏺𓄟𓋴𓎡𓏏𓅱𓏤𓂝𓆑𓆑𓆦𓏺𓏺𓏺𓏺𓏺𓏺
(D10) 𓃬𓏺𓏺𓏺𓋞𓈒𓏤𓏤𓏤𓄿𓈎𓎛𓅱𓌏𓏺𓏺𓂋𓂞𓈖𓈖𓇓𓏏𓆤𓏏𓍹𓇳𓉼𓆣𓋔𓍺𓋞𓈒𓏤𓏤𓏤𓂝𓂝𓋪𓏺𓏺𓏺𓏺
(D11) 𓈙𓃀𓅱𓋝𓏺𓏺𓏺𓏺𓏺𓏺
𓄟𓎡𓏏𓅱𓏺𓏺𓏺𓅓𓐍𓏏𓃀𓏏𓊌𓏺𓋠𓄿𓈎𓎛𓅱𓌏︂𓏺𓏺