Urkunden IV 7
Originally encoded in RES, as part of the St Andrews Corpus.
Converted automatically to Unicode using HieroJax.
𓅃𓉘𓃒𓅓𓋆𓏏𓊂𓊹𓄤𓎟𓇿𓇿𓍹𓇳𓎟𓄇𓏏𓏏𓍺𓅭𓇳𓈖𓄡𓏏𓆑𓍹𓇹𓄟𓊃𓍺𓏙𓋹𓆓𓏏𓇿𓎂𓋹𓇉𓆑𓎟𓂧𓄑𓏏𓊵𓏔𓇓𓈞𓏏𓇓𓅐𓏏𓍹𓏏𓏏𓇋𓀔𓍺𓋹𓍘𓆓𓏏𓇿
(1) 𓆣𓂋𓇓𓏏𓅱𓋴𓇛𓏜𓍛𓏤𓆑𓅓𓍑𓄿𓂧𓅱𓉐𓇓𓏏𓆤𓏏𓍹𓇳𓎟𓄇𓏏𓏏𓍺𓅭𓇳𓍹𓇹𓄟𓋴𓍺𓏙𓋹
(2) 𓂋𓏏𓏏𓊪𓂝𓅨𓏏𓎿𓏏𓅱𓅨𓏏𓆭𓏏𓇓𓅭𓏏𓇓𓌢𓏏𓊹𓈞𓏏𓇓𓈞𓏏𓅨𓏏𓍹𓇹𓄟𓄤𓏏𓇋𓂋𓏭𓍺𓋹𓍘𓐍𓏏𓆑𓍛𓏤𓆑𓌡𓏤𓂝𓆓𓂧𓆑
(3) 𓐍𓏏𓆑𓏤𓏤𓏌𓆑𓁷𓏤𓎛𓎛𓏭𓂻𓅜𓐍𓏏𓏜𓏤𓏤𓏤𓂜𓈖𓏏𓅂𓇋𓅓𓀼𓏤𓏤𓏤𓄝𓑀𓏏𓏏𓈖𓈖𓈖𓂧𓂋𓊪𓂡𓁷𓏤𓆼𓄿
(4) 𓇋𓇋𓏏𓊱𓋴𓇅𓆓𓏛𓂝𓃀𓅡𓄿𓉸𓅓𓁶𓏤𓏏𓂋𓆵𓇳𓎟𓅓𓊪𓊃𓂧𓈖𓇷𓐝𓇹𓇼𓂧𓎳𓉐𓂋𓏏𓋴𓅓𓎳
(5) 𓐍𓏏𓏛𓏤𓏤𓏤𓆼𓄿𓏭𓅱𓇰𓇹𓇼𓏺𓏺𓏺𓏺𓏺𓈖𓏏𓎳𓏺𓏺𓏺𓏺𓏺𓏺𓈖𓏏𓎳𓉔𓄿𓎡𓎳𓍯𓎼𓎳𓅝𓇋𓇋𓎳𓁶𓏤
(6) 𓏏𓂋𓆵𓇳𓎟𓈖𓇯𓈖𓇿𓆓𓂧𓌢𓏏𓆑𓅱𓈙𓏴𓃀𓀁𓋴𓐍𓂋𓆑𓋴𓆼𓄿𓀁𓏏𓅱𓇑𓇑𓁷𓏤𓊄𓏭𓏛𓇋𓍱𓊃𓏏
(7) 𓋴𓆓𓂧𓏏𓅱𓌃𓂧𓏏𓀁𓏏𓈖𓁷𓏤𓇋𓐍𓏛𓊪𓏏𓏭𓆵𓀁𓇹𓂋𓂻𓂋𓄂𓏏𓏭𓄣𓎡𓇓𓏏𓈖𓆓𓊃𓆑𓆓𓂧𓆑𓐍𓂋𓊃𓏌𓎡
(8) 𓊪𓅱𓋴𓆼𓄿𓀁𓈖𓀀𓅐𓅐𓏏𓀀𓅐𓇋𓏏𓆑𓇓𓈞𓏏𓅨𓏏𓇓𓅐𓍹𓏏𓏏𓇋𓀔𓍺𓐙𓏏𓂝𓊤
(9) 𓃹𓈖𓈖𓇋𓇩𓋴𓏭𓉐𓊃𓈘𓏤𓊢𓂝𓏏𓉐𓋴𓅓𓍘𓄿𓏏𓄁𓇳𓁷𓏤𓅭𓏏𓅱𓈇𓏤𓏤𓏤𓋆𓏏𓈈𓈽𓆓𓂧𓈖𓇑𓇑𓐍𓂋𓏏𓇋𓅱
(10) 𓋁𓃀𓈖𓍛𓏤𓏙𓏏𓁹𓏏𓈖𓋴𓍋𓅓𓉴𓉗𓏏𓉐𓅓𓇿𓂦𓈉𓅓𓃅𓏏𓏠𓏌𓏌𓏌𓏌𓏤𓍛𓏤𓄞𓂧𓈙𓏤𓆑𓅱𓂧𓏴𓂡𓆱𓏏𓏤𓏤𓏤𓆑
(11) 𓋴𓏠𓈖𓏛𓅮𓄿𓅱𓏏𓏔𓏤𓏤𓏤𓆑𓎼𓂋𓍅𓏛𓅓𓂋𓍿𓀀𓁐𓏤𓏤𓏤𓅘𓎛𓃀𓏴𓅱𓅓𓄿𓎛𓏏𓈇𓏤𓏤𓏤𓃅𓅱
(12) 𓅓𓏠𓈖𓏠𓈖𓏏𓃒𓏤𓏤𓏤𓍛𓂓𓀀𓏤𓏤𓏤𓎛𓌨𓃀𓀀𓏤𓏤𓏤𓁷𓏤𓇋𓂋𓏏𓋴𓈖𓏤𓏤𓏤𓊃𓀀𓎟𓂋𓐍𓏛𓁶𓏤𓂋𓂧
(13) 𓂾𓏛𓆑𓇋𓋴𓏏𓆓𓂧𓈖𓍛𓏤𓆑𓌃𓂧𓏏𓀁𓍿𓈖𓇋𓅱𓇑𓇑𓐍𓂤𓅱𓋴𓏜𓅓𓁹𓏏𓁹𓈖𓍛𓏤𓆑
(14) 𓇑𓇑𓈖𓉻𓏏𓈖𓌻𓂋𓂋𓆑𓊃𓂋𓐍𓏏𓏜𓎟𓏏𓈖𓊃𓊪𓊗𓁹𓇓𓏏𓈖𓇋𓇋𓅱𓁶𓊪𓅱𓂝𓏤𓀼𓏤𓏤𓏤𓏇𓏏𓏏𓏜𓇋𓂋𓏭
(15) 𓈖𓅐𓏏𓏤𓏤𓏤𓋴𓈖𓏤𓏤𓏤𓇋𓋴𓏏𓍛𓏤𓆑𓍑𓄿𓏴𓂡𓆑𓂝𓏤𓆑𓈎𓇋𓎛𓂢𓆑𓂧𓏏𓏤𓆑𓁹𓆑𓈖𓋴𓇓𓏙𓊵𓏏𓊪
(16) 𓅬𓃀𓀭𓇷𓏏𓊹𓊹𓊹𓇷𓏏𓊹𓊹𓊹𓈖𓆓𓊃𓏏𓑃︀𓇋𓑕𓈖𓑕𓊪𓑕𓅱𓑕𓀭𓑕
(17) 𓏃𓊹𓉲𓆼𓅓𓏐𓏊𓏤𓏤𓏤𓃾𓅿𓏤𓏤𓏤𓇋𓍯𓅱𓃒𓑕𓑃︀
(18) 𓈖𓂓𓑕𓏤𓑕𓈖𓑕𓑃︀